يا جدتي
راكبة ف قطر الذكريات
لجل ما ألقى جدتى
ومخدتى
ترقص من الفرح الخفى
عمرك عفى
غير الصراحة ما تعرفى
لفتينى ف اشتياقك
وف وفائك
للطبيعة والغنا
يا جدتى
حبك ما يعرف الأنا
قلبك شموع ما تنطفى
حضنك هنا
بتجمعينا كلنا
وتعلمينا بلم شملك نرتوى
أنتى الحكيمة المؤمنة
متمكنه لما تقولى وتوعدى
ومصاحبة لشهور السنة
بابه وبؤنه
وتوت وطوبة
وحافظة كل الأزمنة
صبرك وطول بالك منى
ماليتى قلبك بالضيا
وف طرحتك لفه الأمان
ف بالطو جواه محبتك
خيرك كتير
قاسمة الرغيف بالبسملة
بين الولاد
سد الرغيف جوع البعاد
جوا عيونك ميت أمل
قربك علام
حتى الكلام
من خبرتك
شهد يا جده وفلسفة
كل نصايحك دى حلق
متزينه بيها الودان
صونوا اللسان
أدوا كتير
خلى الحقيقة موقفك
دستور حياتك مصحفك
تجنى الرضا
طول الحياة
يا عقد لولى ف قسمتى
يا جدتى
ليست هناك تعليقات:
إرسال تعليق